IPL 2025 मधून BCCI ने किती पैसे कमवले? जाणून घ्या, प्रत्येक मॅचमधून किती उत्पन्न मिळाले?

मुंबई: २०२५ चा इंडियन प्रीमियर लीग यशस्वीरित्या संपून एक आठवडा झाला आहे. ३ जून रोजी अहमदाबादच्या नरेंद्र मोदी स्टेडियमवर झालेल्या आयपीएल अंतिम सामन्यात रजत पाटीदारच्या नेतृत्वाखालील रॉयल चॅलेंजर्स बंगळुरूने पंजाब किंग्जवर ६ धावांनी रोमांचक विजय मिळवत पहिल्यांदाच आयपीएल चषक जिंकला. दोन महिन्यांहून अधिक काळ क्रिकेट चाहत्यांचे मनोरंजन करणाऱ्या आयपीएल हंगामाने BCCI आणि सर्व १० संघांवर पैशांचा पाऊस पाडला. मिलियन डॉलर क्रिकेट स्पर्धा म्हणून ओळखल्या जाणाऱ्या आयपीएलमधून BCCI ने भरघोस नफा कमावला.

आयपीएलमधून BCCI ला मिळणारा सर्वात मोठा नफा म्हणजे प्रसारण शुल्क. २०२५ च्या आयपीएलच्या प्रसारण हक्कांमधून BCCI ला तब्बल ९,६७८ कोटी रुपये मिळाले. म्हणजेच एका सामन्यापासून BCCI ला १३०.७ कोटी रुपये मिळाले. या आयपीएल हंगामाचे प्रसारण हक्क स्टार स्पोर्ट्सने विकत घेतले होते. तर डिजिटल प्रसारणाचे हक्क रिलायन्स इंडस्ट्रीज लिमिटेडच्या उपकंपनी वायकॉमने विकत घेतले होते.

एंडोर्समेंटमध्येही वाढ:

Related Articles

इकॉनॉमिक टाइम्सच्या वृत्तानुसार, २०२५ च्या आयपीएल हंगामातील एंडोर्समेंटमध्ये २७% वाढ झाली असून, सध्या ती १०५% वर पोहोचली आहे. गेल्या वर्षी टाटा समूहाने २५०० कोटी रुपये देऊन २०२४ ते २०२८ या कालावधीसाठी म्हणजेच ५ वर्षांसाठी आयपीएलचे टायटल स्पॉन्सरशिप विकत घेतले होते. याचा अर्थ दरवर्षी BCCI ला टायटल स्पॉन्सरशिपमधून ५०० कोटी रुपये मिळतात. याशिवाय उत्पन्न वाटपाच्या स्वरूपात अनेक कंपन्यांकडून BCCI ला पैशांचा पाऊस पडत आहे.

BCCI ला मिळालेला मोठा नफा:

वृत्तानुसार, BCCI ला प्रत्येक संघाच्या केंद्रीय आणि प्रायोजकत्व उत्पन्नातून २०% नफा मिळतो. तसेच परवाना उत्पन्नातून १२% नफा मिळतो. BCCI प्रत्येक संघाला एक निश्चित केंद्रीय उत्पन्न देते. लीगमधील कामगिरीवर आधारित बदलते उत्पन्न दिले जाते. २०२४ या आर्थिक वर्षात BCCI ने २०,६८६ कोटी रुपये कमावले. तर २०२३ या आर्थिक वर्षात BCCI ने १६,४९३ कोटी रुपये कमावले होते.

१८ व्या इंडियन प्रीमियर लीगच्या बाबतीत बोलायचे झाल्यास, भव्य आयोजनानंतर भारत आणि पाकिस्तानमध्ये सीमा तणावामुळे स्पर्धा एका आठवड्यासाठी स्थगित करण्यात आली होती. नंतर परिस्थिती शांत झाल्यावर आयपीएल पुन्हा सुरू करण्यात आला. परदेशी खेळाडूंना परत भारतात आणण्यात BCCI यशस्वी झाले. तसेच जागतिक कसोटी अजिंक्यपद स्पर्धेच्या काही दिवस आधीच जोश हेजलवूडसह प्रमुख खेळाडू आयपीएल खेळण्यासाठी भारतात आले, जे जागतिक स्तरावर BCCI ची ताकद दर्शवते.